ନୟାଗଡ଼ର ପ୍ରଥମ ଶରୀର ଦାତା ହଜାରି ବରାଡଙ୍କ ସ୍ମୃତି ସଭା ସମାରୋହ, ଶରୀର ଦାନ: ମହାନ୍ ଦାନ, ଚିରସ୍ମରଣୀୟ ଅବଦାନ

ନୟାଗଡ଼: ଶରୀର ଦାନ କାର୍ଯ୍ୟକ୍ରମ ଓଡ଼ିଶାରେ ଏକ ମହତ୍ ଆନ୍ଦୋଳନ ରୂପେ ଗତି କରୁଛି । ଏହି ପ୍ରବାହରେ ନୟାଗଡ଼ ଜିଲ୍ଲାରେ ପ୍ରଥମ ଶରୀର ଦାତା ଭାବେ ଇତିହାସ ସୃଷ୍ଟି କରିଛନ୍ତି କଟରାଝରି ଗ୍ରାମର ବୟସ୍କ କୃଷକ ଓ ସମାଜସେବୀ ହଜାରି ବରାଡ଼ । ତାଙ୍କରି ସ୍ମୃତି ଚାରଣ ସଭା ଗତ ଦିନରେ ଗ୍ରାମ ମଣ୍ଡପରେ ଅନୁଷ୍ଠିତ ହୋଇଥିଲା| 

ହଜାରି ବରାଡ଼ଙ୍କ ଦେହାନ୍ତ ପରେ ତାଙ୍କ ସୁପୁତ୍ର ପବିତ୍ର ଇନ୍ଦ୍ରଜିତ ପିତାଙ୍କ ଇଚ୍ଛାକୁ ସମ୍ମାନ ଦେଇ ପାରମ୍ପାରିକ ରୀତି ଛାଡି ଶବକୁ କଟକ ସ୍ଥିତ ଶ୍ରୀରାମଚନ୍ଦ୍ର ଭଞ୍ଜ ମେଡିକାଲ କଲେଜକୁ ଦାନ କରିଥିଲେ । ଏହି ସାହସିକ ଓ ମହାନ୍ ନିଷ୍ପତ୍ତି ଯୋଗୁଁ ହଜାରି ବରାଡ଼ ଜିଲ୍ଲାର ପ୍ରଥମ ଶରୀର ଦାତା ହୋଇଥିଲେ । ଏହା ଚିକିତ୍ସା ଶିକ୍ଷା ଓ ଗବେଷଣା କ୍ଷେତ୍ରରେ ଅମୂଲ୍ୟ ଅବଦାନ ରୂପେ ଚିହ୍ନିତ ।
ସୁପରିଚିତ ସାମ୍ୟବାଦୀ ନେତା ଓ ସାହିତ୍ୟିକ ବିଶ୍ଵନାଥ ମହାପାତ୍ରଙ୍କ ସଭାପତିତ୍ୱରେ ଅନୁଷ୍ଠିତ ଏହି ସ୍ମୃତି ସଭାକୁ ରାଜ୍ୟ ଶରୀର ଦାନ ଆନ୍ଦୋଳନର ବରିଷ୍ଠ କର୍ମୀ ଦେବେନ୍ଦ୍ର ସୂତାର ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ପରିବେଶ କର୍ମୀ ସୁକାନ୍ତ ଚୌଧୁରୀ, ପ୍ରକୃତି ବନ୍ଧୁ ଅନାଦି ଚରଣ ମହାନ୍ତି, ଡାକ୍ତର ରାକେଶ କୁମାର ସାହୁ, ସମାଜସେବୀ ଭଗବାନ ସାହୁ, ପାଣ୍ଡବ ନାୟକ, ବିଭୁ ପ୍ରସାଦ ମିଶ୍ର, କାମାକ୍ଷା ପ୍ରସାଦ ଦାସ ଆଦି ଅନେକ ଗଣ୍ୟମାନ୍ୟ ବ୍ୟକ୍ତି ସମ୍ମାନିତ ଅତିଥି ଭାବେ ଉପସ୍ଥିତ ଥିଲେ ।
ସଭାରେ ବକ୍ତାମାନେ ଶରୀର ଦାନ ଓ ଅଙ୍ଗ ଦାନର ମହତ୍ତ୍ୱ ବିଷୟରେ ବିସ୍ତୃତ ଆଲୋଚନା କରିଥିଲେ । ରାଜ୍ୟ ଶରୀର ଦାନ ଆନ୍ଦୋଳନର ଦେବେନ୍ଦ୍ର ସୂତାର ଜିଲ୍ଲାରେ ଏହାକୁ ଏକ ଜନଆନ୍ଦୋଳନରେ ପରିଣତ କରିବାକୁ ଆହ୍ୱାନ ଦେଇଥିଲେ । ଉପସ୍ଥିତ ଶରୀର ଦାତା ଓ ସଂଯୋଜକମାନେ ଏଥିପାଇଁ ଏକତ୍ରିତ ଭାବେ କାର୍ଯ୍ୟଯୋଜନା ପ୍ରସ୍ତୁତ କରିଥିଲେ । 

ଏହି ସୁଯୋଗରେ ପୂର୍ବରୁ ଶରୀର ଦାନ ପାଇଁ ପଞ୍ଜୀକୃତ ଦଶ ଜଣ ଦାତାଙ୍କୁ ସମ୍ମାନିତ କରାଯାଇଥିଲା । ସେମାନଙ୍କ ମଧ୍ୟରେ କବି ପରମା ନନ୍ଦ ସ୍ୱାଇଁ, ସୁକାନ୍ତ ଚୌଧୁରୀ ଏବଂ ବରିଷ୍ଠ ଶିକ୍ଷକ ଡଃ ଗିରିଜା କାନ୍ତ ମହାପାତ୍ର ଆଦି ଉଲ୍ଲେଖନୀୟ । ଆହୁରି ଅଧିକ ଉତ୍ସାହଜନକ ଘଟଣା ଥିଲା ୨୫ ଜଣ ନୂଆ ସ୍ୱେଚ୍ଛାସେବୀ ଶରୀର ଦାନ ପାଇଁ ପଞ୍ଜୀକରଣ କରିବା । ଏହା ଜିଲ୍ଲାରେ ଶରୀର ଦାନ ଆନ୍ଦୋଳନକୁ ନୂଆ ଗତି ଦେବ ବୋଲି ଆଶା କରାଯାଉଛି ।
ସଭାର ଆୟୋଜକ ପବିତ୍ର ଇନ୍ଦ୍ରଜିତ ସମସ୍ତ ଅତିଥି, ସଂଯୋଜକ ଓ ଗ୍ରାମବାସୀଙ୍କୁ ଏହି ମହତ୍ କାର୍ଯ୍ୟରେ ସହଯୋଗ ପାଇଁ ହୃଦୟଙ୍ଗଳ ଧନ୍ୟବାଦ ଜଣାଇଥିଲେ । ସଭା "ହଜାରି ବରାଡ଼ ଅମର ରହେ" ଶ୍ଳୋଗାନ ସହିତ ସମାପ୍ତ ହୋଇଥିଲା ।
ପବିତ୍ର ଇନ୍ଦ୍ରଜିତଙ୍କ ଏହି ସାହସିକ ଓ ମାନବିକ ନିଷ୍ପତ୍ତି ଜିଲ୍ଲାବାସୀଙ୍କ ପାଇଁ ପ୍ରଶଂସନୀୟ ଓ ଅନୁକରଣୀୟ । ହଜାରି ବରାଡ଼ଙ୍କ ଏହି ଅମୂଲ୍ୟ ଦାନ ଚିକିତ୍ସା ବିଦ୍ୟାର ଭବିଷ୍ୟତ ପିଢିଙ୍କ ଶିକ୍ଷା ଓ ଗବେଷଣାକୁ ଉନ୍ନତ କରିବାରେ ସହାୟକ ହେବ, ଏବଂ ସେ ସାମାଜିକ ସଚେତନତା ଓ ସେବାର ଏକ ଦୀପସ୍ତମ୍ଭ ଭାବେ ସଦାବେଳେ ସ୍ମରଣୀୟ ରହିବେ ।