୮୮ ହଜାରରୁ ଅଧିକ ପତ୍ରପତ୍ରିକା ବାତିଲ: ୫.୬୩ କୋଟି ଜରିମାନା ଆଦାୟ କଲା ସୂଚନା ଓ ପ୍ରସାରଣ ମନ୍ତ୍ରଣାଳୟ

ନୂଆଦିଲ୍ଲୀ: ସୂଚନା ଓ ପ୍ରସାରଣ ମନ୍ତ୍ରଣାଳୟ ଅନୁଯାୟୀ, ଫେବୃଆରୀ ୨୭ ସୁଦ୍ଧା ବିଭିନ୍ନ ପତ୍ରପତ୍ରିକା ଉପରେ ୫.୬୩ କୋଟିରୁ ଅଧିକ ଟଙ୍କାର ଜରିମାନା ଲଗାଯାଇଛି ଏବଂ ପ୍ରେସ୍ ସେବା ପୋର୍ଟାଲ୍ (Press Sewa Portal) ମାଧ୍ୟମରେ ଏହା ପୈଠ କରାଯାଇଛି। ଏଥିସହ ସାରା ଦେଶରେ ୮୮,୩୧୫ଟି ପ୍ରକାଶନକୁ ବାତିଲ କରାଯାଇଛି। 

ଲୋକସଭା ସାଂସଦ ଦାମୋଦର ଅଗ୍ରୱାଲଙ୍କ ଏକ ଲିଖିତ ପ୍ରଶ୍ନର ଉତ୍ତର ଦେଇ ସୂଚନା ଓ ପ୍ରସାରଣ ଏବଂ ସଂସଦୀୟ ବ୍ୟାପାର ରାଷ୍ଟ୍ରମନ୍ତ୍ରୀ ଏଲ୍. ମୁରୁଗାନ ବୁଧବାର (୧୧ ମାର୍ଚ୍ଚ, ୨୦୨୬) କହିଛନ୍ତି ଯେ, 'ପ୍ରେସ୍ ଆଣ୍ଡ୍ ରେଜିଷ୍ଟ୍ରେସନ ଅଫ୍ ପିରିଓଡିକାଲ୍ସ' (PRP) ଅଧିନିୟମ ଅନୁଯାୟୀ, ପତ୍ରପତ୍ରିକା ପଞ୍ଜୀକରଣ ପାଇଁ ସମସ୍ତ ଆବେଦନ ଏବେ ପ୍ରେସ୍ ସେବା ପୋର୍ଟାଲ୍ ମାଧ୍ୟମରେ ଡିଜିଟାଲ୍ ପଦ୍ଧତିରେ କରାଯାଉଛି।

ପୂର୍ବରୁ ପ୍ରଚଳିତ 'ପ୍ରେସ୍ ଆଣ୍ଡ୍ ରେଜିଷ୍ଟ୍ରେସନ ଅଫ୍ ବୁକ୍ସ' (PRB) ଆକ୍ଟ, ୧୮୬୭ (ଯାହା ଏବେ ରଦ୍ଦ ହୋଇସାରିଛି) ଅଧୀନରେ ଥିବା ୧.୫ ଲକ୍ଷରୁ ଅଧିକ ଖବରକାଗଜର ସମସ୍ତ ଭୌତିକ ରେକର୍ଡକୁ ଡିଜିଟାଇଜ୍ କରାଯାଇ ପ୍ରେସ୍ ସେବା ପୋର୍ଟାଲର ଅଂଶବିଶେଷ କରାଯାଇଛି।
ଏହି ଅଧିନିୟମର କାର୍ଯ୍ୟକାରିତା ପାଇଁ ୭୮୦ଟି ଜିଲ୍ଲାର ନିର୍ଦ୍ଧାରିତ କର୍ତ୍ତୃପକ୍ଷଙ୍କୁ ପ୍ରେସ୍ ସେବା ପୋର୍ଟାଲ୍ ସହିତ ଯୋଡ଼ାଯାଇଛି।

ମାର୍ଚ୍ଚ ୧, ୨୦୨୪ ଠାରୁ ଏପର୍ଯ୍ୟନ୍ତ ୧୧,୦୮୧ଟି ଆବେଦନ ପ୍ରକ୍ରିୟାକରଣ କରାଯାଇ ସମ୍ପୃକ୍ତ ବର୍ଗଗୁଡିକ ପାଇଁ ପ୍ରମାଣପତ୍ର ଜାରି କରାଯାଇଛି ବୋଲି କେନ୍ଦ୍ର ମନ୍ତ୍ରୀ ସୂଚନା ଦେଇଛନ୍ତି।