ପ୍ରସାର ଭାରତୀର ବଡ଼ ପଦକ୍ଷେପ: 'Creators Corner' ଜରିଆରେ କ୍ରିଏଟରଙ୍କୁ ମିଳିବ ପାରିଶ୍ରମିକ

ନୂଆଦିଲ୍ଲୀ: ପ୍ରସାର ଭାରତୀ ନିଜର କପିରାଇଟ୍ ସୁରକ୍ଷାକୁ ନେଇ ଅଧିକ ସତର୍କ ହେବା ସହ ଦୂରଦର୍ଶନରେ 'କ୍ରିଏଟର୍ସ କର୍ଣ୍ଣର୍' (Creators Corner) ନାମକ ଏକ ଅଭିନବ ପ୍ରୟାସ ଆରମ୍ଭ କରିଛି। ସାମାଜିକ ପ୍ରାସଙ୍ଗିକତା ଏବଂ ଭାରତୀୟ ସଂସ୍କୃତିକୁ ପ୍ରୋତ୍ସାହନ ଦେବା ଉଦ୍ଦେଶ୍ୟରେ ଏହି ପଦକ୍ଷେପ ନିଆଯାଇଛି। 

ସୂଚନା ଓ ପ୍ରସାରଣ ରାଷ୍ଟ୍ରମନ୍ତ୍ରୀ ଡକ୍ଟର ଏଲ୍. ମୁରୁଗାନ୍ ରାଜ୍ୟସଭାରେ ଏକ ପ୍ରଶ୍ନର ଉତ୍ତର ଦେଇ କହିଛନ୍ତି ଯେ, ପ୍ରସାର ଭାରତୀ ଦ୍ୱାରା ନିର୍ମିତ ସମସ୍ତ ବିଷୟବସ୍ତୁର କପିରାଇଟ୍ ସୁରକ୍ଷିତ ରହିଛି। ବିଭିନ୍ନ ସୋସିଆଲ ମିଡିଆ ପ୍ଲାଟଫର୍ମରେ ହେଉଥିବା ବେଆଇନ ଉଲ୍ଲଂଘନ ଉପରେ ସଂସ୍ଥା ନଜର ରଖିଛି। 

ଏହି 'କ୍ରିଏଟର୍ସ କର୍ଣ୍ଣର୍' ଅଧୀନରେ ଚୟନ ହେବାକୁ ଥିବା କ୍ରିଏଟର୍‌ମାନଙ୍କ ପାଇଁ ସ୍ୱତନ୍ତ୍ର ନିୟମାବଳୀ ପ୍ରସ୍ତୁତ କରାଯାଇଛି। ଯେଉଁମାନଙ୍କର ସୋସିଆଲ ମିଡିଆରେ ଭଲ କଣ୍ଟେଣ୍ଟ ରହିଛି ଏବଂ ଯେଉଁମାନେ ପ୍ରସାର ଭାରତୀର ବିଜ୍ଞାପନ କୋଡ୍ ପାଳନ କରୁଛନ୍ତି, ସେମାନଙ୍କୁ ଚୟନ କରାଯିବ। ଏଥିସହ ସେମାନଙ୍କୁ ସମୟ-ଭିତ୍ତିକ ନିର୍ଦ୍ଧାରିତ ଦର ଅନୁଯାୟୀ ପାରିଶ୍ରମିକ ମଧ୍ୟ ପ୍ରଦାନ କରାଯିବ।