Vedanta Expands Free Rural Healthcare: ଉନ୍ନତ ସ୍ୱାସ୍ଥ୍ୟସେବା ପାଇଲେ ୯୩୦୦ରୁ ଊର୍ଦ୍ଧ୍ୱ ଲୋକ

ଭୁବନେଶ୍ୱର, ୧/୦୯: ଦୁର୍ଗମ ତଥା ଅପହଞ୍ଚ ଇଲାକାରେ ବାସ କରୁଥିବା ଲୋକଙ୍କ ପାଖରେ ସମୟୋଚିତ ଏବଂ ଗୁଣାତ୍ମକ ସ୍ୱାସ୍ଥ୍ୟସେବା ପହଞ୍ଚାଇବା ଲକ୍ଷ୍ୟରେ ବେଦାନ୍ତ ଆଲୁମିନିୟମ୍ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଇଛି। ରାୟଗଡ଼ା ଏବଂ କଳାହାଣ୍ଡି ଜିଲ୍ଲାର ସିଜିମାଳି ଏବଂ କୋଡିଙ୍ଗାମାଳି ବକ୍ସାଇଟ୍ ଖଣି ସଂଲଗ୍ନ ଗାଁଗୁଡ଼ିକରେ କମ୍ପାନୀ ନିଜର ଭ୍ରାମ୍ୟମାଣ ସ୍ୱାସ୍ଥ୍ୟ ୟୁନିଟ୍ (ଏମ୍ଏଚ୍‌ୟୁ), ଆମ୍ବୁଲାନ୍ସ ଏବଂ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର (ପିଏଚ୍‌ସି) ମାଧ୍ୟମରେ ୯୩୦୦ରୁ ଅଧିକ ହିତାଧିକାରୀଙ୍କୁ ଉନ୍ନତ ସ୍ୱାସ୍ଥ୍ୟସେବା ଯୋଗାଇ ଦେଇ ଏକ ନୂଆ ଉଦାହରଣ ସୃଷ୍ଟି କରିଛି। 

ଗାଁ ଦାଣ୍ଡରେ ମାଗଣା ଚିକିତ୍ସା ଓ ଔଷଧ

ବିଶେଷଜ୍ଞ ଡାକ୍ତର ଓ ଉପଯୁକ୍ତ ଯାତାୟାତ ଅଭାବରୁ ଗ୍ରାମାଞ୍ଚଳର ରୋଗୀ, ଗର୍ଭବତୀ ମହିଳା ଓ ଶିଶୁମାନେ ସମ୍ମୁଖୀନ ହେଉଥିବା ସମସ୍ୟାକୁ ଦୃଷ୍ଟିରେ ରଖି କମ୍ପାନୀ ନିଜର ସେବାକୁ ତ୍ୱରାନ୍ୱିତ କରିଛି। ୨୦୨୬ ଏପ୍ରିଲରୁ ଜୁଲାଇ ମାସ ମଧ୍ୟରେ ଉଭୟ ଜିଲ୍ଲାରେ ୨୨୫ଟି ଏମ୍ଏଚ୍‌ୟୁ କ୍ୟାମ୍ପ୍ ଆୟୋଜନ କରାଯାଇଥିଲା। ଏଥିରେ ରାୟଗଡ଼ାର ୮୫ଟି ଶିବିର ମାଧ୍ୟମରେ ୨୫୫୮ ଜଣ ଏବଂ କଳାହାଣ୍ଡିର ୧୪୦ଟି ଶିବିର ମାଧ୍ୟମରେ ୨୯୩୬ ଜଣ ଲୋକ ଉପକୃତ ହୋଇଛନ୍ତି। ମୋଟ ୫୪୯୪ ଜଣ ରୋଗୀଙ୍କୁ ସେମାନଙ୍କ ଘର ପାଖରେ ମାଗଣା ପରାମର୍ଶ, ରୋଗ ନିର୍ଣ୍ଣୟ ଓ ଅତ୍ୟାବଶ୍ୟକ ଔଷଧ ବଣ୍ଟନ କରାଯାଇଛି।

ସଞ୍ଜୀବନୀ ସାଜିଛି ପିଏଚ୍‌ସି ଏବଂ ଆମ୍ବୁଲାନ୍ସ ସେବା

ରାୟଗଡ଼ା ଜିଲ୍ଲା ସୁଙ୍ଗର ଠାରେ ଥିବା ବେଦାନ୍ତ-ସମର୍ଥିତ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ଅଞ୍ଚଳବାସୀଙ୍କ ପାଇଁ ୨୪ ଘଣ୍ଟିଆ ସେବା ଯୋଗାଉଛି। ରିପୋର୍ଟ ଅନୁଯାୟୀ, ମେ' ରୁ ଜୁଲାଇ ମଧ୍ୟରେ ଏଠାରେ ୨୫୬୩ ରୋଗୀ ଚିକିତ୍ସିତ ହୋଇଥିବା ବେଳେ ୬୦ଟି ସଫଳ ପ୍ରସବ କରାଯାଇଛି। ଉନ୍ନତ ଯତ୍ନ ଫଳରେ ଏଠାରେ ନବଜାତ ଶିଶୁ ମୃତ୍ୟୁହାର ଶୂନ୍ୟ ରହିଛି।
ସେହିପରି ଜରୁରୀକାଳୀନ ସ୍ଥିତି, ବିଶେଷକରି ଗର୍ଭବତୀ ଓ ଦୁର୍ଘଟଣାଗ୍ରସ୍ତଙ୍କ ପାଇଁ ବେଦାନ୍ତର ଆମ୍ବୁଲାନ୍ସ ସେବା ବରଦାନ ସାଦୃଶ୍ୟ ହୋଇଛି। ତିନି ମାସ ମଧ୍ୟରେ ରାୟଗଡ଼ାର କାଶିପୁର ବ୍ଲକରେ ୯୫ ଥର ଓ କଳାହାଣ୍ଡିର ଥୁଆମୂଳ ରାମପୁରରେ ୫୧ ଥର ଏହି ଜରୁରୀକାଳୀନ ପରିବହନ ସେବା ଉପଲବ୍ଧ କରାଯାଇ ଜୀବନ ରକ୍ଷା କରାଯାଇପାରିଛି।

ବିଶେଷଜ୍ଞ ପରାମର୍ଶ ଏବଂ ସଚେତନତା ଶିବିର

ଦୁର୍ଗମ ଅଞ୍ଚଳର ଲୋକଙ୍କୁ ସହର ଭଳି ବିଶେଷଜ୍ଞ ଚିକିତ୍ସା ଯୋଗାଇଦେବା ପାଇଁ କାଶିପୁର ଓ ମେଲଘର ଠାରେ ମଲ୍ଟି-ସ୍ପେଶାଲିଟି ସ୍ୱାସ୍ଥ୍ୟ ଶିବିର ଆୟୋଜନ କରାଯାଇଥିଲା। ଏଥିରେ ଶିଶୁରୋଗ ବିଶେଷଜ୍ଞଙ୍କ ସମେତ ଅନ୍ୟାନ୍ୟ ବିଶେଷଜ୍ଞ ଡାକ୍ତରମାନେ ୩୫୮ ଜଣ ରୋଗୀଙ୍କ ସ୍ୱାସ୍ଥ୍ୟ ପରୀକ୍ଷା କରିଥିଲେ।
ଏହାବ୍ୟତୀତ ରୋଗ ନିରାକରଣ ଓ ସଚେତନତା ଉପରେ କମ୍ପାନୀ ବିଶେଷ ଗୁରୁତ୍ୱ ଦେଇଆସୁଛି: 

• ମ୍ୟାଲେରିଆ ଓ ଡେଙ୍ଗୁ ନିରାକରଣ: ସୁଙ୍ଗର, ଲଦାଖମାନ, ଡୁମେରପାଦର, ମହାଜଲ ଓ ମେଲଘରା ଆଦି ଗାଁରେ ୨୨୦ରୁ ଅଧିକ ସ୍ଥାନୀୟ ଲୋକ ଓ ଛାତ୍ରଛାତ୍ରୀଙ୍କୁ ସଚେତନ କରାଯାଇଛି।
• ମାତୃ ଓ ଶିଶୁ ସ୍ୱାସ୍ଥ୍ୟ: ନକ୍ରୁଣ୍ଡି ଏବଂ ସୁଙ୍ଗର ପିଏଚ୍‌ସି ଠାରେ ସ୍ତନ୍ୟପାନ ଓ ପୁଷ୍ଟିସାଧନ ଉପରେ ଆୟୋଜିତ କାର୍ଯ୍ୟକ୍ରମରେ ୨୦୯ ଜଣ ମାଆ ଅଂଶଗ୍ରହଣ କରିଥିଲେ। କେବଳ ନକ୍ରୁଣ୍ଡିର ନନ୍ଦ ଘର କାର୍ଯ୍ୟକ୍ରମରେ ୬ଟି ଗାଁର ୭୪ ଜଣ ମାଆ ସାମିଲ ହୋଇଥିଲେ। ଆଶା ଓ ଅଙ୍ଗନବାଡ଼ି କର୍ମୀଙ୍କ ସହାୟତାରେ ଏହି ସଚେତନତା ଅଭିଯାନ ସଫଳ ହୋଇପାରିଛି।
• ପୋଲିଓ ନିରାକରଣ: ସୁଙ୍ଗର ପିଏଚ୍‌ସିରେ ବେଦାନ୍ତ ସମର୍ଥିତ ପଲ୍ସ ପୋଲିଓ କାର୍ଯ୍ୟକ୍ରମରେ ୯୦ ଜଣ ଶିଶୁଙ୍କୁ ଟିକାକରଣ କରାଯାଇଛି।

ଏହି ନିରନ୍ତର ପ୍ରୟାସ ସମ୍ପର୍କରେ ମତ ରଖି କମ୍ପାନୀ ପକ୍ଷରୁ କୁହାଯାଇଛି ଯେ, ଲାଞ୍ଜିଗଡ଼ରେ ସଫଳ ସ୍ୱାସ୍ଥ୍ୟସେବା ପରିବେଶ ସୃଷ୍ଟି କରିବା ପରେ ଏବେ ରାୟଗଡ଼ା ଓ କଳାହାଣ୍ଡିର ଅପହଞ୍ଚ ଇଲାକା ଉପରେ ପ୍ରାଧାନ୍ୟ ଦିଆଯାଉଛି। ଖୁବଶୀଘ୍ର ରାୟଗଡ଼ାରେ ନିର୍ମାଣ ହେବାକୁ ଥିବା 'ବେଦାନ୍ତ ଡାକ୍ତରଖାନା' ଏହି ଅଞ୍ଚଳର ସ୍ୱାସ୍ଥ୍ୟ ଭିତ୍ତିଭୂମିକୁ ଆହୁରି ସୁଦୃଢ଼ କରିବ। ଗ୍ରାମାଞ୍ଚଳରେ ଏକ ସୁସ୍ଥ ଓ ସଶକ୍ତ ସମାଜ ଗଠନ ଦିଗରେ ବେଦାନ୍ତ ଆଲୁମିନିୟମ୍ ନିଜର ପ୍ରତିବଦ୍ଧତା ଜାରି ରଖିଛି।