ଦାରିଙ୍ଗବାଡ଼ି ସ୍ୱାସ୍ଥ୍ୟକେନ୍ଦ୍ରରେ ଅଚଳ ଏକ୍ସ-ରେ ମେସିନ୍, ୨୫ ପଞ୍ଚାୟତର ରୋଗୀ ପ୍ରଭାବିତ

ଦାରିଙ୍ଗିବାଡ଼ି, (ରିପୋର୍ଟ - ମାଥିଉ ମୁଠାମାଝି): କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଗତ ଚାରି ଦିନ ଧରି ଏକ୍ସ-ରେ ସେବା ବନ୍ଦ ରହିଛି। ସ୍ୱାସ୍ଥ୍ୟକେନ୍ଦ୍ରରେ ଥିବା ଏକମାତ୍ର ଡିଜିଟାଲ୍ ଏକ୍ସ-ରେ ମେସିନ୍‌ଟି ବର୍ତ୍ତମାନ କାମ କରୁନାହିଁ। ଏହି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଉପରେ ଦାରିଙ୍ଗବାଡ଼ି ବ୍ଲକ୍‌ର ପ୍ରାୟ ୨୫ଟି ଗ୍ରାମ ପଞ୍ଚାୟତର ଜନସାଧାରଣ ନିର୍ଭର କରନ୍ତି। ମେସିନ୍ ଖରାପ ଥିବାରୁ ଦୈନିକ ହସ୍ପିଟାଲ୍ ଆସୁଥିବା ରୋଗୀମାନେ ଏକ୍ସ-ରେ ପରୀକ୍ଷା କରାଇ ପାରୁନାହାନ୍ତି। ଏହା ଫଳରେ ସାଧାରଣ ରୋଗୀ ଓ ଦୁର୍ଘଟଣାରେ ଆହତ ହୋଇଥିବା ବ୍ୟକ୍ତିମାନଙ୍କ ପ୍ରାଥମିକ ଚିକିତ୍ସା ପ୍ରକ୍ରିୟାରେ ବାଧା ସୃଷ୍ଟି ହେଉଛି। 

ଏକ୍ସ-ରେ ମେସିନ୍ କାମ ନକରିବାରୁ ଦାରିଙ୍ଗବାଡ଼ି ଓ ଏହାର ଆଖପାଖ ଅଞ୍ଚଳର ରୋଗୀମାନେ ବାହାର ସ୍ଥାନକୁ ଯିବାକୁ ବାଧ୍ୟ ହେଉଛନ୍ତି। ଜରୁରୀକାଳୀନ ସ୍ଥିତିରେ ରୋଗୀମାନେ ବାଲିଗୁଡ଼ା ଉପଖଣ୍ଡ ଚିକିତ୍ସାଳୟ କିମ୍ବା ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଯାଉଛନ୍ତି। କିଛି ରୋଗୀ ଗଞ୍ଜାମ ଜିଲ୍ଲାର ବ୍ରହ୍ମପୁର କିମ୍ବା ଭଞ୍ଜନଗର ସ୍ଥିତ ମେଡିକାଲ୍ ଓ ଘରୋଇ କ୍ଲିନିକ୍‌କୁ ଯାଇ ଏକ୍ସ-ରେ ପରୀକ୍ଷା କରାଉଛନ୍ତି। ଦୂର ସ୍ଥାନକୁ ଯାତ୍ରା କରିବା ଯୋଗୁଁ ରୋଗୀ ଓ ସେମାନଙ୍କ ପରିବାର ଲୋକଙ୍କୁ ଅଧିକ ଯାତାୟାତ ଖର୍ଚ୍ଚ ଦେବାକୁ ପଡ଼ୁଛି। ଏହା ସହିତ ଯାତ୍ରା ପାଇଁ ଅଧିକ ସମୟ ଲାଗୁଛି ଏବଂ ଚିକିତ୍ସା ପାଇବାରେ ବିଳମ୍ବ ଘଟୁଛି। ସ୍ଥାନୀୟ ଅଞ୍ଚଳରେ ଅନ୍ୟ କୌଣସି ସରକାରୀ ବିକଳ୍ପ ବ୍ୟବସ୍ଥା ନଥିବାରୁ ଦୂରବର୍ତ୍ତୀ ଗ୍ରାମର ଲୋକମାନେ ଆର୍ଥିକ ଅସୁବିଧାର ସମ୍ମୁଖୀନ ହେଉଛନ୍ତି।
ଦାରିଙ୍ଗବାଡ଼ି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ କୌଣସି ଅସ୍ଥିଶଲ୍ୟ (ଅର୍ଥୋପେଡିକ୍) ବିଶେଷଜ୍ଞ ଡାକ୍ତର ନାହାନ୍ତି। ତଥାପି ସାଧାରଣ ଡାକ୍ତରମାନେ ପ୍ରାଥମିକ ଚିକିତ୍ସା, ହାଡ଼ ଭଙ୍ଗା ଚିହ୍ନଟ ଓ ରୋଗ ନିରୂପଣ ପାଇଁ ଏହି ଡିଜିଟାଲ୍ ଏକ୍ସ-ରେ ମେସିନ୍ ଉପରେ ନିର୍ଭର କରନ୍ତି। ଗତ କିଛି ବର୍ଷ ଧରି ଏହି ମେସିନ୍ ସ୍ଥାନୀୟ ରୋଗୀଙ୍କୁ ପ୍ରାଥମିକ ପରୀକ୍ଷା ସେବା ଯୋଗାଇ ଆସୁଛି। କିନ୍ତୁ ବିଗତ ଦିନମାନଙ୍କରେ ଏହି ମେସିନ୍‌ଟି ବାରମ୍ବାର ଯାନ୍ତ୍ରିକ ତ୍ରୁଟି ଯୋଗୁଁ ଅଚଳ ହେଉଥିବା ଦେଖିବାକୁ ମିଳିଛି।
ଯେତେବେଳେ ମେସିନ୍ ଖରାପ ହୁଏ, ସ୍ୱାସ୍ଥ୍ୟକେନ୍ଦ୍ର କର୍ତ୍ତୃପକ୍ଷ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଚିଠି ଏବଂ ଇ-ମେଲ୍ ମାଧ୍ୟମରେ ସୂଚନା ଦିଅନ୍ତି। ତା'ପରେ ସେଠାରୁ ଟେକ୍ନିସିଆନ୍ ଆସି ମେସିନ୍ ମରାମତି କରନ୍ତି। ଏହି ପୂରା ପ୍ରକ୍ରିୟାରେ ଅନେକ ଦିନ ସମୟ ଲାଗିଯାଏ। ଟେକ୍ନିସିଆନ୍ ଆସିବାରେ ବିଳମ୍ବ ହେଲେ ଏକ୍ସ-ରେ ସେବା ସ୍ୱାଭାବିକ ହେବା ପାଇଁ ଅଧିକ ଦିନ ଅପେକ୍ଷା କରିବାକୁ ପଡ଼େ। ଏହି ସ୍ଥିତି ସ୍ୱାସ୍ଥ୍ୟକେନ୍ଦ୍ରର ଦୈନନ୍ଦିନ କାର୍ଯ୍ୟକୁ ପ୍ରଭାବିତ କରୁଛି।
ଏହି ଘଟଣା ବିଷୟରେ ଅଧିକ ସୂଚନା ପାଇବା ପାଇଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଅଧିକାରୀ ଡାକ୍ତର ଜାକେଶ ସାମନ୍ତରାୟଙ୍କ ସହିତ ଯୋଗାଯୋଗ କରାଯାଇଥିଲା, କିନ୍ତୁ ତାହା ସମ୍ଭବ ହୋଇପାରି ନାହିଁ। ଅନ୍ୟପକ୍ଷରେ, ବ୍ଲକ୍ ପ୍ରୋଗ୍ରାମ୍ ମ୍ୟାନେଜର୍ (ବିପିଏମ୍) ଶାନ୍ତନୁ କୁମାର ସାହୁ ଏହି ସମସ୍ୟା ସମ୍ପର୍କରେ ସୂଚନା ଦେଇଛନ୍ତି।
ବିପିଏମ୍ କହିଛନ୍ତି ଯେ ଏକ୍ସ-ରେ ମେସିନ୍‌ର ସଫ୍ଟୱେର୍‌ରେ କିଛି ତ୍ରୁଟି ଦେଖାଦେଇଛି, ଯାହା ଫଳରେ ମେସିନ୍ କାମ କରୁନାହିଁ। ଏହି ସମସ୍ୟା ବିଷୟରେ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟର ଉଚ୍ଚ କର୍ତ୍ତୃପକ୍ଷଙ୍କୁ ଇ-ମେଲ୍ ମାଧ୍ୟମରେ ଅବଗତ କରାଯାଇଛି। ଖୁବ୍ ଶୀଘ୍ର ବିଶେଷଜ୍ଞ ଟେକ୍ନିସିଆନ୍ ଆସି ମେସିନ୍‌ର ମରାମତି କରିବେ ଏବଂ ରୋଗୀମାନଙ୍କ ପାଇଁ ଏକ୍ସ-ରେ ସେବା ପୁନର୍ବାର ଆରମ୍ଭ ହେବ ବୋଲି ସେ ପ୍ରକାଶ କରିଛନ୍ତି।
ସୂଚନାଯୋଗ୍ୟ ଯେ, ଦାରିଙ୍ଗବାଡ଼ି ଏକ ଦୂରବର୍ତ୍ତୀ ଓ ଆଦିବାସୀ ବହୁଳ ଅଞ୍ଚଳ। ଏଠାରେ ସ୍ୱାସ୍ଥ୍ୟ ସେବା ବ୍ୟବସ୍ଥାକୁ ଅଧିକ କ୍ରିୟାଶୀଳ ରଖିବା ପାଇଁ ଏବଂ ମେସିନ୍ ମରାମତି ପାଇଁ ଏକ ସ୍ଥାୟୀ ଓ ଦୃତ ବ୍ୟବସ୍ଥା ଗ୍ରହଣ କରିବାକୁ ସ୍ଥାନୀୟ ବାସିନ୍ଦାମାନେ ପ୍ରଶାସନ ପାଖରେ ଦାବି ଜଣାଇଛନ୍ତି।