ପାଣି ନୁହେଁ ପଙ୍କ: ଟିକାବାଲିରେ କାନ୍ଦୁଛି ‘ବସୁଧା’!

ଟିକାବାଲି, କନ୍ଧମାଳ: ୦୫/୦୪: (ଆକୁଳାନନ୍ଦ ଦିଗାଲ): ରାଜ୍ୟ ସରକାର ପ୍ରତିଟି ଘରକୁ ଶୁଦ୍ଧ ପାନୀୟ ଜଳ ଯୋଗାଇ ଦେବା ପାଇଁ ‘ବସୁଧା’ ଯୋଜନାରେ କୋଟି କୋଟି ଟଙ୍କା ପାଣି ଭଳି ଖର୍ଚ୍ଚ କରୁଥିବା ବେଳେ, ବାସ୍ତବ କ୍ଷେତ୍ରରେ କିନ୍ତୁ ଚିତ୍ର ସମ୍ପୂର୍ଣ୍ଣ ଭିନ୍ନ। କନ୍ଧମାଳ ଜିଲ୍ଲା ଟିକାବାଲି ବ୍ଲକ ଅନ୍ତର୍ଗତ କଟିମାହା ଗ୍ରାମରେ ଏହି ମହତ୍ତ୍ୱାକାଂକ୍ଷୀ ଯୋଜନା ଏବେ ଫସର ଫାଟିଛି। ଗ୍ରାମବାସୀଙ୍କୁ ନିର୍ମଳ ଜଳ ବଦଳରେ ମିଳୁଛି ଗୋଳିଆ ଓ କାଦୁଅ ମିଶା ବିଷାକ୍ତ ପାଣି। ବିଭାଗୀୟ ଅଧିକାରୀଙ୍କ ଖାମଖିଆଲି ମନୋଭାବ ଯୋଗୁଁ ଲୋକେ ଜଳକଷ୍ଟ ଭୋଗିବା ସହ ରୋଗବ୍ୟାଧିର ଶିକାର ହେବା ଆଶଙ୍କା ସୃଷ୍ଟି ହୋଇଛି। 

କୂଅରୁ ବାହାରୁଛି ପଙ୍କ, ପାଇପ୍‌ରେ ଆସୁଛି କାଦୁଅ

ସୂଚନା ଅନୁସାରେ, ଗ୍ରାମକୁ ଜଳ ଯୋଗାଣ ପାଇଁ ନିକଟସ୍ଥ ନଦୀ ପଠାରେ ଏକ ସ୍ୱତନ୍ତ୍ର ଚାମ୍ବର ଓ କୂଅ ନିର୍ମାଣ କରାଯାଇଛି। କିନ୍ତୁ ଅଭିଯୋଗ ହେଉଛି ଯେ, ନିର୍ମାଣ କାର୍ଯ୍ୟ ଶେଷ ହେବା ପରେ କୂଅ ଭିତରୁ ପଙ୍କ ଓ କାଦୁଅ ସଫା କରାଯାଇ ନାହିଁ। ଫଳରେ ମୋଟର ଚାଲିବା ମାତ୍ରେ ପାଇପ୍ ଯୋଗେ ସିଧାସଳଖ କାଦୁଅ ମିଶା ଗୋଳିଆ ପାଣି ଗ୍ରାମବାସୀଙ୍କ ଟ୍ୟାପ୍‌କୁ ଯାଉଛି। ଏପରିକି ପାଇପ୍ ଚାଳକ ମଧ୍ୟ ନିଜର ଅସହାୟତା ପ୍ରକାଶ କରି କହିଛନ୍ତି, "ଯେ ପର୍ଯ୍ୟନ୍ତ କୂଅରୁ ସମ୍ପୂର୍ଣ୍ଣ ପଙ୍କ ବାହାର କରାଯାଇ ନାହିଁ, ସେ ପର୍ଯ୍ୟନ୍ତ ବର୍ଷ ସାରା ଏହିଭଳି ଦୂଷିତ ଜଳ ଆସିବା ସୁନିଶ୍ଚିତ।"

ଯନ୍ତ୍ରୀଙ୍କ ‘ଜାନୁଆରୀ ପ୍ରତିଶ୍ରୁତି’ ପାଣିର ଗାର

ଗ୍ରାମବାସୀଙ୍କ କହିବା ଅନୁଯାୟୀ, ଗତ ଜାନୁଆରୀ ମାସରୁ ସେମାନେ ଏହି ସଙ୍ଗିନ ସମସ୍ୟା ନେଇ ବିଭାଗୀୟ କନିଷ୍ଠ ଯନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ପାଣି ସଫା ରଖିବା ପାଇଁ ଫିଟିକିରି ବ୍ୟବହାର କରିବା ଓ କୂଅ ସଫା କରିବାକୁ ଯନ୍ତ୍ରୀ ସେତେବେଳେ ପ୍ରତିଶ୍ରୁତି ଦେଇଥିଲେ। ମାତ୍ର ଆଶ୍ଚର୍ଯ୍ୟର ବିଷୟ, ତିନି ମାସ ବିତିଯାଇଥିଲେ ମଧ୍ୟ ଏ ଦିଗରେ କୌଣସି ପଦକ୍ଷେପ ନିଆଯାଇ ନାହିଁ। ଅଧିକାରୀଙ୍କ ଏଭଳି ଦାୟିତ୍ୱହୀନତାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି।

ବଢୁଛି ଆନ୍ଦୋଳନର ନିଆଁ

ପାନୀୟ ଜଳର ଅନ୍ୟ କୌଣସି ବିକଳ୍ପ ସୁବିଧା ନଥିବାରୁ ଗ୍ରାମର ମହିଳା ଓ ବୃଦ୍ଧବୃଦ୍ଧାମାନେ ବାଧ୍ୟ ହୋଇ ଏହି ଦୂଷିତ ଜଳକୁ ବ୍ୟବହାର କରୁଛନ୍ତି। ଏହାଦ୍ୱାରା ପେଟ ରୋଗ ସମେତ ବିଭିନ୍ନ ସଂକ୍ରାମକ ରୋଗ ବ୍ୟାପିବା ନେଇ ଗ୍ରାମବାସୀ ଭୟଭୀତ ଅଛନ୍ତି।

"ଆମ କଥା କେହି ଶୁଣୁନାହାନ୍ତି। ଆମେ କ’ଣ ମଣିଷ ନୁହେଁ? କେତେ ଦିନ ଏହି କାଦୁଅ ପାଣି ପିଇ ଆମେ ବଞ୍ଚିବୁ?" - ସ୍ଥାନୀୟ ବାସିନ୍ଦା

ତୁରନ୍ତ ଏହି ଘଟଣାର ତଦନ୍ତ କରି ନଦୀରେ ଥିବା କୂଅକୁ ସଫା କରିବା ସହ ସ୍ୱଚ୍ଛ ଜଳ ଯୋଗାଇ ଦେବାକୁ ଗ୍ରାମବାସୀ ଜିଲ୍ଲା ପ୍ରଶାସନ ନିକଟରେ ଦାବି କରିଛନ୍ତି। ଯଦି ଆଗାମୀ ଦିନରେ ଏହି ସମସ୍ୟାର ସମାଧାନ ନହୁଏ, ତେବେ ଗ୍ରାମବାସୀ ରାଜପଥକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।