ପ୍ରବାସରେ ଉତ୍କଳ ଦିବସ: ମଧ୍ୟପ୍ରଦେଶର ପିଥମପୁରରେ ଓଡ଼ିଆଙ୍କ ମେଳି

ନୟାଗଡ: (ରିପୋର୍ଟ -ରାମକୃଷ୍ଣ ରଥ): ମଧ୍ୟପ୍ରଦେଶର ଇନ୍ଦୋର ନିକଟସ୍ଥ ପିଥମପୁରଠାରେ ଉତ୍କଳ ଦିବସ ଖୁବ୍ ଆନନ୍ଦ ଉଲ୍ଲାସର ସହ ପାଳିତ ହୋଇଯାଇଛି। ସ୍ଥାନୀୟ ଜଗନ୍ନାଥ ମନ୍ଦିର ପରିସରରେ ‘ଜୟ ଜଗନ୍ନାଥ ସାଂସ୍କୃତିକ ପରିଷଦ’ ପକ୍ଷରୁ ଏହି ଉତ୍ସବର ଆୟୋଜନ କରାଯାଇଥିଲା। ନିଜ ଜନ୍ମମାଟି ଛାଡ଼ି ପିଥମପୁରରେ ରହୁଥିବା ଶହ ଶହ ପ୍ରବାସୀ ଓଡ଼ିଆ ଏହି କାର୍ଯ୍ୟକ୍ରମରେ ଏକାଠି ହୋଇଥିଲେ। 

ସ୍ଥାନୀୟ ଥାନା ଅଧିକାରୀ ଶ୍ରୀ ସତୀଶ ଶର୍ମା କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ପରିଷଦର ସଭାପତି ଶିବ ପ୍ରକାଶ ମୋଦି, ସମ୍ପାଦକ ବିବିଧ କୁମାର ଜେନା, ଉପସଭାପତି ଦୁର୍ଗା ଚରଣ ରାଉତ ଏବଂ ମୁଖ୍ୟ ଉପଦେଷ୍ଟା ତଥା ରାଜା ରମଣା ସେଣ୍ଟର ଫର୍ ଆଡଭାନ୍ସଡ୍ ଟେକ୍ନୋଲୋଜି (RRCAT) ର ବରିଷ୍ଠ ବୈଜ୍ଞାନିକ ଡ. ଶ୍ରୀନିବାସ ଶତପଥୀ ମିଳିତ ଭାବେ ପ୍ରଦୀପ ପ୍ରଜ୍ୱଳନ କରି ଉତ୍ସବର ଶୁଭାରମ୍ଭ କରିଥିଲେ। ଅନ୍ୟମାନଙ୍କ ମଧ୍ୟରେ କୋଷାଧ୍ୟକ୍ଷ ପ୍ରକାଶ ରାଉତ ଏବଂ ଉପଦେଷ୍ଟାମଣ୍ଡଳୀର ସଦସ୍ୟ ଅଶୋକ ଜେନା, ହୃଦାନନ୍ଦ ବେହେରା, ପ୍ରତାପ ମହାପାତ୍ର, ପ୍ରହ୍ଲାଦ ମହାନ୍ତି, ନିରଞ୍ଜନ ବିଶ୍ୱାଳ ଓ ଶିବ ପ୍ରସାଦ ବିଶ୍ୱାଳ ପ୍ରମୁଖ ଉପସ୍ଥିତ ଥିଲେ। 

ଉତ୍ସବର ମୁଖ୍ୟ ଆକର୍ଷଣ ଥିଲା ସାଂସ୍କୃତିକ କାର୍ଯ୍ୟକ୍ରମ। ପ୍ରଖ୍ୟାତ ଓଡ଼ିଶୀ ନୃତ୍ୟଶିଳ୍ପୀ ଶ୍ରୀମତୀ ସ୍ୱୟଂପ୍ରଜ୍ଞା ସାହୁ ଏବଂ ତାଙ୍କ ଛାତ୍ରୀମାନେ ଚମତ୍କାର ଓଡ଼ିଶୀ ନୃତ୍ୟ ପରିବେଷଣ କରି ଦର୍ଶକଙ୍କ ମନ ମୋହିଥିଲେ। ଏହାପରେ ଆରଆରସିଏଟିର ବୈଜ୍ଞାନିକମାନେ ଏକ ସୁନ୍ଦର ହାସ୍ୟରସାତ୍ମକ ନାଟକ ‘ଆପଣ ସାକ୍ଷୀ ରହିଲେ ହଜୁର’ ମଞ୍ଚସ୍ଥ କରିଥିଲେ।
ଦିଲେଶ୍ୱର ମହାରଣା ଏହି ନାଟକଟିକୁ ଲେଖିଥିଲେ। ଆରଆରସିଏଟିର ବରିଷ୍ଠ ବୈଜ୍ଞାନିକ ଡ. ଖଗେଶ୍ୱର ସାହୁ ଏହାର ନିର୍ଦ୍ଦେଶନା ଦେଇଥିବା ବେଳେ ଡ. ପ୍ରଶାନ୍ତ ସାହାଣୀ ସଙ୍ଗୀତ ନିର୍ଦ୍ଦେଶନା ଦେଇଥିଲେ। ଏଥିରେ ବିଜୟ କୁମାର ସାହୁ, ସୋଖେନ ଟୁଡୁ ଓ ଅରିଜିତ ଦାସ ମୁଖ୍ୟ ଭୂମିକାରେ ଅଭିନୟ କରିଥିଲେ। ସେହିପରି ଅଶୋକ ସାହୁ, ପୂଜା ରାଉତ, ଡାକା କାଲା, ସର୍ବେଶ୍ୱର ସର୍ଦାର, କୁଶଲ ମୁର୍ମୁ ଏବଂ ଡ. ଖଗେଶ୍ୱର ସାହୁ ସହ-କଳାକାର ଭାବେ ନିଖୁଣ ଅଭିନୟ କରିଥିଲେ। ଦର୍ଶକମାନେ ଏହି ନାଟକକୁ ବହୁତ ପ୍ରଶଂସା କରିଥିଲେ।
କାର୍ଯ୍ୟକ୍ରମ ଶେଷରେ ଆୟୋଜକମାନେ କୃତୀ ପ୍ରତିଯୋଗୀମାନଙ୍କୁ ପୁରସ୍କାର ବଣ୍ଟନ କରିଥିଲେ। ଆଗାମୀ ଦିନରେ ଜଗନ୍ନାଥ ସଂସ୍କୃତି ଏବଂ ସାଂସ୍କୃତିକ ପରିଷଦର ବ୍ୟାପକ ପ୍ରସାର ପାଇଁ ଅନୁଷ୍ଠାନର ସଦସ୍ୟମାନେ ସଂକଳ୍ପ ଗ୍ରହଣ କରିଥିଲେ।